Dy të rinj nga Gana kanë zgjehdur të punësohen në Shqipëri.
Kui e Plenti shërbejnë si kamarierë në një prej lokaleve në pazarin e vjetër të Korçës. Ata ndodhen në vendin tonë prej një muaji dhe tashmë kanë nisur të mësojnë edhe fjalët e para në shqip.
Të dy të rinjtë tregojnë se janë ndjerë mirë në Korçë dhe se mendojnë të vijojnë të punojnë e të jetojnë këtu për një kohë të gjatë:
“Zgjodha të vij në Shqipëri pasi më pëlqen të shoqërohem me njerëz, prandaj çova cv time në një agjenci për të punuar këtu. Këtu ka njerëz shumë të mirë, të dashur dhe të sjellshëm. Mendoj se për sa kohë jam e lumtur do të vijoj të qëndroj gjatë këtu”, u shpreh e reja.
“Kam qenë në Gana qëkur kam lindur dhe nuk kisha udhëtuar asnjëherë, prandaj vendosa të udhëtoj dhe të vij në Shqipëri. Duke parë historinë e Shqipërisë këtu është një nga qytetet më të vjetra, ka edhe një nga gjuhët më të bukura por edhe të vështira, prandaj vendosa të vij këtu të takoj njerëz të rinj dhe të bëj miq të rinj. Aplikova përmes një agjencie për të punuar këtu dhe për të marrë një eksperiencë jete. Tani për tani kam një kontratë një vjeçare pune, por për sa kohë do të ndihem mirë këtu do të vijoj të qëndroj edhe më gjatë, pasi njerëzit këtu janë të këndshëm dhe ndihem mirë”, shprehet i riu nga Gana.
Pazari i Korçës vijon të mbetet një nga vendet e preferuara për tu vizituar nga turistë vendas e të huaj. Të gjitha baret, restorantet por edhe hotelet në këtë zonë janë të frekuentuara masivisht gjatë këtyre ditëve të nxehta të gushtit.