Katër shtetas shqiptarë janë vënë në pranga nga autoritetet britanike, pasi rezultonin të shpallur në kërkim ndërkombëtar nga Italia për një sërë veprash penale, kryesisht të lidhura me trafikun ndërkombëtar të drogës dhe krime të rënda.
Të arrestuarit kishin gjetur strehim në qytete të ndryshme të Anglisë, për të shmangur ndjekjen penale nga autoritetet italiane.
Emrat dhe akuzat:
Fation Haskaj, 41 vjeç – U paraqit përpara gjykatës City of Westminster Magistrate Court, ku nisi procesi i shqyrtimit të kërkesës për ekstradim. Ai akuzohet nga prokurorët italianë për tentativë vrasje dhe plagosje me dashje.
Geraldo Bejaj, 35 vjeç – Arrestuar në zonën Cottage Grove, Londër. Ai akuzohet për trafik droge dhe për pjesëmarrje në një organizatë kriminale ndërkombëtare, që drejtohej prej tij dhe një shtetasi maroken. Grupi kishte transportuar dhe shpërndarë sasi të mëdha kanabisi nga Shqipëria drejt Italisë.
Mariglen Qefalia, 41 vjeç – I arrestuar për llogari të autoriteteve italiane, ndaj tij rëndojnë 14 akuza për trafik droge.
Gëzim Topalli, 41 vjeç – Arrestuar në zonën Harrow, Londër. Ai përballet me 10 akuza për trafik droge dhe 10 të tjera për grabitje të sendeve me vlerë, sipas dosjes së prokurorisë italiane.
Operacioni i arrestimit u krye në koordinim me Interpol-in dhe autoritetet italiane, dhe sipas mediave italiane, të paktën dy prej të arrestuarve kanë qenë pjesë e grupeve kriminale me degë aktive në Shqipëri, Itali dhe Britani.
Të pestë pritet të përballen me procesin gjyqësor të ekstradimit në javët në vijim. Nëse ekstradimi miratohet, ata do të dalin përpara drejtësisë italiane për të përballuar akuzat e rënda që u ngarkohen.