Shqipëria regjistroi 6,241 raste të qytetarëve që përfituan ndihmë juridike falas gjatë vitit 2025, sipas të dhënave zyrtare. Shumica e tyre kërkuan mbrojtje ose këshillim ligjor për shkak të pamundësisë për të paguar shërbime private.
“Në aspektin e shërbimeve, Drejtoria e Ndihmës Juridike Falas ka asistuar mbi 5,400 qytetarë me ndihmë juridike parësore dhe 841 qytetarë me ndihmë juridike dytësore. Paralelisht, është shënuar një rritje prej 48% e vendimeve gjyqësore të likuiduara, si dhe një rritje prej 41.5% e buxhetit të shpenzuar për këtë qëllim, çka dëshmon për funksionalitet më të lartë të sistemit dhe rritje të kërkesës për shërbimin.”- thuhet në raportin vjetor të drejtorisë.
Sipas ligjit, ndihmën juridike parësore mund ta ofrojnë: a) punonjësit me trajnim të posaçëm; b) organizatat jofitimprurëse të autorizuara; c) klinikat ligjore pranë institucioneve të arsimit të lartë. Sa i përket ndihmës juridike dytësore, qytetarët jo vetëm përfitojnë përfaqësim me avokat falas, por tani mund të përjashtohen edhe nga të gjitha tarifat dhe shpenzimet gjyqësore.
“Nisur dhe nga natyra e çështjeve të ndihmës juridike, karakteri sensitiv që ato kanë, përfaqësimi me avokat falas dhe ndjekja e procesit në gjykatë është i një rëndësie thelbësore për rivendosjen në vend të të drejtave për kërkuesit e shërbimit e ndihmës juridike falas. Ndihma juridike dytësore jepet nga avokatët që përfshihen në listën e miratuar nga Dhoma e Avokatisë së Shqipërisë”, thuhet në raport.
Raportimi i Drejtorisë së Ndihmës Juridike Falas, nën varësi të Ministrisë së Drejtësisë, tregon se për vitin 2025 ishin të angazhuar të paktën 132 avokatë me kontratë për ofrimin e shërbimit.
“Nga 140 avokatë që nënshkruan kontratë për ofrimin e shërbimit për ndihmën juridike dytësore, aktualisht këtë shërbim e ofrojnë 132 avokatë për vitin 2025, pasi 3 avokatë janë tërhequr në mënyrë të njëanshme për shkaqe ligjore dhe për 5 (pesë) ofrues të ndihmës juridike dytësore Drejtoria e Ndihmës Juridike Falas ka vendosur zgjidhjen e menjëhershme të kontratës për shkak se kanë refuzuar monitorimin fillestar nga strukturat përgjegjëse të Drejtorisë së Ndihmës Juridike, ndërsa një ofrues nuk plotësonte kriteret themelore për ushtrimin e shërbimit”, vlerëson dokumenti./Monitor