Avokati Ulian Barjami, i arrestuar më 18 tetor pas një përplasjeje verbale me prokurorin Gjergji Ceka gjatë një seance gjyqësore në Gjykatën e Elbasanit, është liruar nga paraburgimi këtë të hënë.
Burime zyrtare konfirmojnë se lirimi është kryer rreth orës 16:00, pasi prokurorja e çështjes ka vlerësuar ndalimin si të paligjshëm, duke urdhëruar menjëherë lirimin e tij.
Në një njoftim zyrtar, Prokuroria e Elbasanit ka sqaruar se ndaj avokatit ishin dërguar materiale hetimore për veprat penale “Kanosje për shkak të detyrës” (neni 238/3), “Kanosje e gjyqtarit” (neni 317) dhe “Kundërshtim dhe goditje e gjyqtarit” (neni 316) të Kodit Penal.
Sipas prokurorisë, ngjarja ndodhi më 17 tetor 2025, gjatë një seance për vlerësimin e arrestimeve në flagrancë të 14 personave të arrestuar më 13 tetor. Barjami, në rolin e mbrojtësit të njërit prej të ndaluarve, dyshohet se ka kanosur prokurorin e çështjes dhe oficerët e policisë gjyqësore brenda sallës së gjyqit.
Pas incidentit, policia gjyqësore kishte administruar regjistrimin audio të seancës, dhe mbi bazën e tij ishte vendosur ndalimi i avokatit. Por, pas shqyrtimit të dokumentacionit, prokuroria ka konstatuar se nuk ekzistonin kushtet ligjore për vijimin e ndalimit, duke urdhëruar lirimin e menjëhershëm të tij.
Në deklaratën e saj, Prokuroria e Elbasanit thekson se të gjitha hallkat e drejtësisë – gjyqtarë, prokurorë, avokatë dhe oficerë policie – duhet të bashkëpunojnë me respekt dhe integritet profesional, pa cenuar pavarësinë e njëri-tjetrit.
“Qëndrimet publike të nxituara dhe të pabazuara dëmtojnë misionin e përbashkët për mbrojtjen e drejtësisë. Prokuroria mbetet e vendosur të garantojë zbatimin e ligjit në mënyrë të barabartë për të gjithë,” – thuhet në reagimin zyrtar.
Hetimet për incidentin vijojnë, ndërsa procedimi penal ndaj avokatit Barjami mbetet i hapur, për të përcaktuar nëse ka pasur apo jo elementë të veprave penale të përmendura.