Policia e Durrësit ka zbardhur një ngjarje të rëndë, e cila fillimisht u dyshua si humbje jete për shkaqe natyrale, por që pas hetimeve rezultoi të ishte pasojë e një konflikti fizik.
Në pranga është vënë shtetasi G.K., 42 vjeç, i dyshuar për veprën penale “Vrasja nga pakujdesia”.
Sipas hetimeve, më datë 13 prill 2026, në lagjen nr. 18 të Durrësit, 42-vjeçari është konfliktuar për motive të dobëta me shtetasin S.M., 59 vjeç, dhe më pas e ka goditur me grushte.
Si pasojë e goditjeve, 59-vjeçari ka humbur ndjenjat, është rrëzuar në asfalt dhe më pas ka ndërruar jetë.
Fillimisht u raportua se viktima kishte humbur jetën nga arresti kardiak, por pas veprimeve intensive hetimore dhe nën drejtimin e Prokurorisë, u provua se vdekja nuk kishte ardhur nga shkaqe natyrale.
42-vjeçari është arrestuar, ndërsa hetimet vijojnë për dokumentimin e plotë të rastit.