Sekretari i Përgjithshëm i NATO-s, Mark Rutte, dërgoi një paralajmërim të fortë Rusisë pas rrëzimit të disa dronëve të saj në hapësirën ajrore të Polonisë. Rutte theksoi se aleanca transatlantike është e gatshme dhe vigjilente ndaj çdo inkursioni të mëtejshëm.
“Një vlerësim i plotë i incidentit është ende duke u zhvilluar, por është e qartë se kjo shkelje nuk është një ngjarje e izoluar”, deklaroi ai, duke shtuar se mbrojtja ajrore e NATO-s është gjithmonë në gatishmëri.
Shefi i NATO-s i bëri thirrje Rusisë të ndalojë luftën në Ukrainë dhe çdo shkelje të hapësirës ajrore të vendeve aleate. Mbrëmjen e kaluar, dhjetëra dronë rusë hynë në hapësirën ajrore polake, duke detyruar avionët luftarakë polakë dhe të NATO-s të ndërhynin dhe të rrëzonin disa prej tyre, një ngjarje që konsiderohet përshkallëzim serioz i situatës në rajon.