Kryeministri grek Kyriakos Mitsotakis ka deklaruar gjatë një konference për energjinë të Bloomberg se Greqia nuk do të marrë pjesë në operacione ushtarake në Gjiri Persik dhe në zonën e konfliktit në Lindjen e Mesme.
“Përgjigjja është e thjeshtë: jo, Greqia nuk do të përfshihet në asnjë operacion që zhvillohet aktualisht në rajon,” tha Mitsotakis, duke theksuar se nuk ekziston gatishmëri e madhe evropiane për një mision të tillë.
Ai sqaroi se Athina mbështet operacionet evropiane për mbrojtjen e lundrimit në Detin e Kuq, por nuk do të veprojë në Gjirin Persik pa një mandat të qartë të Bashkimit Evropian. Prioritet i qeverisë greke mbetet stabiliteti dhe shmangia e përshkallëzimit të situatës.
Mitsotakis paralajmëroi për pasoja globale në rast të përkeqësimit të situatës në Ngushticën e Hormuzit, duke theksuar se kjo zonë është një nga rrugët më të rëndësishme të transportit të naftës në botë. Ai shtoi se Greqia do të mbrojë lirinë e lundrimit, duke kujtuar se shumë pronarë grekë të anijeve janë të shqetësuar për zhvillimet në rajon.
Ministria e Transportit Detar të Greqisë ka bërë të ditur se aktualisht 168 anije greke, përfshirë 34 me flamur grek, ndodhen në Gjirin Persik, Ngushticën e Hormuzit dhe Gjirin e Omanit, me qindra marinarë grekë që shërbejnë aty dhe monitorohen çdo ditë. Që nga fillimi i konflikteve, disa anije tregtare, përfshirë ato të interesave greke, janë goditur, duke rritur rrezikun në një nga korridoret më strategjike energjetike dhe tregtare të botës