Pas dy përpjekjeve që dështuan, Kuvendi i Kosovës miratoi sot me vota unanime raportin e Komisionit të Përkohshëm për Verifikimin e Mandateve.
Në këtë tentativë, e treta radhazi, pengesa për konstituimin e legjislaturës së re thuhet se u kalua me sukses.
Raporti konfirmon vlefshmërinë e mandateve të deputetëve të rinj të zgjedhur në zgjedhjet e fundit parlamentare si dhe i hap rrugë zhvillimit të pikës së dytë në rendin e ditës: betimit të deputetëve.
Zhvillimi në fjalë mbetet një hap i rëndësishëm drejt formimit të institucioneve të reja të vendit, pasi përfshin krijimin e qeverisë së re të Kosovës.
Ndërsa mësohet se u bë dhe betimi i deputetëve duke i dhënë kështu fund procesit të konstituimit të Kuvendit.
Pas votimit unanim për raportin e mandatit, deputetët e zgjedhur bënë betimin në Kuvendin e Kosovës.
Ata u ngritën të gjithë në këmbë për të lexuar tekstin e betimit, ku lexohet: “Unë, deputet i Kuvendit të Republikës së Kosovës, betohem se me nder e me përkushtim do ta kryej detyrën time dhe do ta përfaqësoj me dinjitet popullin, do të punoj në interes të Kosovës dhe të gjithë shtetasve të saj, do të angazhohem për mbrojtjen dhe për respektimin e kushtetutshmërisë dhe të ligjshmërisë, për mbrojtjen e sovranitetit, tërësisë territoriale dhe të integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit. Betohem!”