Qeveria ka miratuar aktin normativ për rishikimin e buxhetit të shtetit për vitin 2026, duke parashikuar fonde shtesë për pensionet, shëndetësinë, mbrojtjen, mbështetjen e biznesit dhe bujqësisë, si rezultat i performancës pozitive të ekonomisë gjatë pesëmujorit të parë të vitit.
Ministri i Financave, Petrit Malaj, bëri të ditur se ndryshimet synojnë forcimin e mbështetjes për shtresat në nevojë, rritjen e investimeve në sektorin e shëndetësisë dhe zgjerimin e garancisë sovrane për ndërmarrjet e vogla dhe të mesme.
Një nga masat kryesore është afrimi i indeksimit të pensioneve, i cili planifikohet të realizohet në muajin prill të vitit të ardhshëm. Për këtë qëllim është parashikuar një fond shtesë prej 872 milionë lekësh.
Qeveria ka vendosur gjithashtu të dyfishojë pagesën për fëmijët me aftësi të kufizuara, me një financim shtesë prej 750 milionë lekësh. Nga kjo masë do të përfitojnë 10.720 fëmijë dhe ajo do të hyjë në fuqi më 1 korrik 2026.
Po ashtu, shteti do të mbulojë sigurimet shoqërore dhe shëndetësore për kujdestarët e fëmijëve me aftësi të kufizuara, me një efekt financiar prej rreth 2 miliardë lekësh.
Në sektorin e shëndetësisë janë parashikuar 1.5 miliardë lekë shtesë për barnat onkologjike, si dhe fonde për rritjen e pagave të personelit të urgjencës mjekësore. Ndërkohë, do të financohen edhe orët shtesë të punës për 1.250 punonjës të shërbimit zjarrfikës.
Sa i përket mbrojtjes, qeveria do të alokojë 10.3 miliardë lekë shtesë për të përmbushur angazhimet ndaj NATO-s, duke e çuar financimin e këtij sektori në 2.6% të Prodhimit të Brendshëm Bruto.
Gjithashtu, garancia sovrane do të rritet nga 3 në 5 miliardë lekë dhe do të zgjerohet për të përfshirë jo vetëm fermerët, por edhe ndërmarrjet e vogla dhe të mesme.
Ndërkohë, ministrja e Shtetit për Sipërmarrjen dhe Klimën e Biznesit, Delina Ibrahimaj, njoftoi se qeveria do të akordojë një bonus vere prej 5 mijë lekësh për pensionistët.
Sipas saj, nga kjo masë do të përfitojnë rreth 777 mijë pensionistë në të gjithë vendin, ndërsa efekti financiar i saj llogaritet në rreth 3.7 miliardë lekë. Bonusi do të mbulojë të gjithë përfituesit sipas kategorive përkatëse.