Meta e Mark Zuckerberg u përpoq të blinte Thinking Machines Lab, laboratorin e inteligjencës artificiale të themeluar nga Mira Murati, por u përball me një refuzim historik. Sipas The Wall Street Journal, Zuckerberg ofroi deri në 1 miliard dollarë për të marrë kompaninë dhe talente kyçe nga ekipi i Muratit, por as themeluesja dhe as punonjësit nuk pranuan.
Pas refuzimit të Muratit, Meta u përpoq të rekrutonte individë nga ekipi, duke bërë një ofertë personale prej 1 miliard dollarësh për bashkëthemeluesin Andrew Tulloch, një nga inxhinierët më të shquar në fushën e AI. Edhe kjo përpjekje dështoi. Tulloch, së bashku me më shumë se 20 ish-punonjës të OpenAI që iu bashkuan laboratorit të Muratit, zgjodhën të qëndrojnë në Thinking Machines Lab, duke refuzuar edhe pagat astronomike që ofroi Meta.
Ky vendim shihet si një akt i rrallë besnikërie në Silicon Valley, ku zakonisht pagat dhe ofertat e aksioneve janë vendimtare. Burime thonë se Zuckerberg dhe Alexandr Wang, kreu i laboratorit të superinteligjencës së Meta-s, i dërguan mesazhe personale Tulloch-ut për ta bindur, por ai nuk lëvizi nga vendimi i tij.
Thinking Machines Lab mban të fshehtë projektet mbi të cilat po punon, por Murati ka konfirmuar se ekipi është fokusuar në zhvillimin e inteligjencës artificiale multimodale dhe pritet të prezantojë produktin e parë në muajt e ardhshëm.
Refuzimi i 1 miliard dollarëve nga Murati vjen në një kohë kur Meta po ndjek një strategji agresive për të rekrutuar talente nga OpenAI dhe kompani të tjera, duke shënuar se gara për inteligjencën artificiale nuk është vetëm çështje kapitali, por edhe vizioni dhe besimi në misionin e kompanisë.