Gjatë 24 orëve të fundit në vend janë regjistruar 34 vatra zjarri, nga të cilat 27 janë shuar, 5 mbeten aktive, ndërsa 2 po mbahen nën monitorim.
Në operacionet për shuarjen e flakëve janë angazhuar 54 automjete zjarrfikëse dhe 690 forca operacionale, të mbështetura nga 110 trupa të Forcave të Armatosura, me dy mjete zjarrfikëse. Po ashtu, për ndërhyrje ajrore janë përdorur 2 helikopterë të Forcës Ajrore shqiptare dhe 1 helikopter nga Emiratet e Bashkuara Arabe.
Vatrat aktive:
Tërnovë, Zerqan (Bulqizë): Flakët në kurorë pyjesh vijojnë në vendet “Maja e Shkëmbit” dhe drejt fshatrave Valikardhë e Peladhi. Operacioni vijon me forcat e MZSH, bashkiake, Shërbimin Pyjor dhe 30 trupa të FA, me mbështetje nga helikopteri i FA.
Xeth, Blerim (Fushë Arrëz): Zjarri ka përfshirë fshatrat Kulumri, Trun dhe Kunorë-Dardhë. Operacioni vijoi gjatë gjithë ditës me 42 forca bashkiake, 2 automjete zjarrfikëse, 80 trupa nga FA dhe 20 vullnetarë, ndërsa ndërhyrjet ajrore ndihmuan vendosjen e situatës nën kontroll.
Pezë Helmës (Tiranë): Zjarri, vazhdim i flakëve në Damjan-Fortuzaj (Vaqarr), ka dalë jashtë kontrollit mesditën e sotme. Helikopteri i Emirateve të Bashkuara Arabe ka ndërhyrë, ndërsa situata po mbahet nën monitorim.
Kullollas, Kodovjat, Ermenj (Skënderbegas, Gramsh): Një vatër aktive mbetet në Malin e Koshnicës; riaktivizimet e vogla në Bletëz dhe Kullollas janë shuar nga ndërhyrja e mjeteve zjarrfikëse.
Teqeja e Dushkut (Kukur, Gramsh): Vatra e zjarrit po mbahet drejt izolimit, ndërsa shtresa e humusit ka krijuar vështirësi në shuarje.
Rreja e Zezë (Velë, Rubik): Vatra e zjarrit është izoluar plotësisht dhe nuk paraqet rrezik për përhapje.
Parku Natyror Gërmenj (Leskovik, Kolonjë): Disa vatra vijojnë aktive, por pa përhapje, ndërsa shpërthimet e municioneve të mbetura nga lufta italo-greke ndalojnë ndërhyrjen herë pas here.
Vatrat e shuara:
Val (Martanesh, Bulqizë), Kodër Qerre (Mat), Xeth (Blerim, Fushë Arrëz), Durishtë (Petrelë), Ferraj–Zall Herr–Brarë–Priskë e Vogël (Dajt), Gjipal (Zall Bastar), Vilë-Ballaj (Rrogozhinë), Kalanjas (Skrapar).
Forcat e emergjencave dhe strukturat përgjegjëse mbeten në terren për të monitoruar situatën dhe për të ndërhyrë menjëherë në rast të riaktivizimeve të flakëve.
Radar.al