Kreu i Partisë së Lirisë, Ilir Meta, ka urdhëruar analizimin e plotë të rezultatit të zgjedhjeve të 11 majit në çdo qendër votimi të qarkut Tiranë, duke shprehur dyshime për korrektësinë e numëruesve të Partisë Demokratike.
Meta, i cili ndodhet prej muajsh në burg, thekson në një deklaratë se vendimi synon të verifikojë rolin dhe performancën e çdo përfaqësuesi në procesin zgjedhor. Ai falënderoi anëtarët dhe simpatizantët e Partisë së Lirisë që, sipas tij, i qëndruan presioneve të “Narkoshtetit” dhe nuk u përkulën përballë një makinerie kriminale që, siç shprehet ai, “cënoi rëndë standardet demokratike”.
“Firmosa urdhrin për analizimin e çdo Njësie dhe Qendre Votimi në Tiranë. Faleminderit atyre që nuk e shitën as lirinë, as shpirtin, përballë kësaj makinerie shtetërore kriminale”, deklaron Meta në mesazhin e tij publik.
MESAZHI I PLOTË
“Të dashur anëtarë dhe simpatizantë të Partisë së Lirisë,
Firmosa sot urdhrin për analizimin e rezultatit të zgjedhjeve të 11 Majit për çdo Njësi dhe Qendër Votimi në Qarkun Tiranë për të verifikuar punën dhe rolin e gjithsecilit.
Edhe njëherë faleminderit me mirënjohje të gjithë atyre të cilët i rezistuan presioneve të jashtëzakonshme të Narkoshtetit dhe nuk e shitën as lirinë, as shpirtin dhe as karakterin e tyre përballë një makinerie kriminale shtetërore, që cënoi rëndë standardet e zgjedhjeve, demokracinë dhe shtetin e së drejtës, duke vijuar me vendosmëri, qëndresë e kurajë t’i prijnë betejës tonë të përbashkët në mbrojtje të kauzave madhore.”, shprehet Meta.