Një grua 43-vjeçare është shpallur në kërkim dhe një 29-vjeçar është vënë nën hetim, pasi dyshohet se kanë shantazhuar një shtetas për t’i marrë pasuri, duke ndikuar rëndë në gjendjen e tij psikologjike dhe duke e çuar drejt tentativës për vetëvrasje.
Sipas Policisë, shtetasi E. L. ka qenë nën presion të vazhdueshëm përmes mesazheve kërcënuese që i janë dërguar në telefon nga të dy të dyshuarit. Si pasojë, më 28 qershor, ai tentoi të vetëvritej.
Gjatë hetimeve, nga kontrolli në banesën e 29-vjeçarit që po ndiqet në gjendje të lirë, u sekuestrua një armë sportive që mbante pa leje, si dhe një shumë parash në euro, të dyshuara si të falsifikuara.
Policia po vijon hetimet për zbardhjen e plotë të ngjarjes dhe kapjen e 43-vjeçares në kërkim, ndërsa materialet i janë referuar Prokurorisë për veprime të mëtejshme ligjore.