ROMË – Kancelari gjerman Friedrich Merz deklaroi se Gjermania nuk do t’i bashkohet të ashtuquajturit “Bord i Paqes” i propozuar nga presidenti amerikan Donald Trump, duke theksuar se forma aktuale e këtij organi bie ndesh me kushtetutën gjermane.
Në një konferencë për shtyp të mbajtur sot në Romë, Merz u shpreh megjithatë i hapur për dialog dhe forma të reja bashkëpunimi me Shtetet e Bashkuara të Amerikës.
“Ne jemi të gatshëm të eksplorojmë mënyra të reja bashkëpunimi me SHBA-në”, tha Merz, sipas Deutsche Welle. Ai bëri të ditur se, edhe pse disa javë më parë i kishte shprehur presidentit Trump gatishmërinë për të diskutuar pjesëmarrjen në një organ të tillë, kushtet ligjore në Gjermani e bëjnë të pamundur anëtarësimin në formatin aktual të bordit.
Refuzimi i Berlinit e shton Gjermaninë në listën e aleatëve tradicionalë të SHBA-së që kanë hedhur poshtë pjesëmarrjen, përfshirë Francën, Britaninë e Madhe dhe Spanjën. Në të kundërt, Arabia Saudite, Hungaria dhe Katari kanë konfirmuar se do t’i bashkohen bordit të propozuar nga Uashingtoni – një nismë që disa vëzhgues e shohin si përpjekje për të anashkaluar Kombet e Bashkuara.
Ndryshe nga pritshmëritë fillestare, “Bordi i Paqes” nuk është kufizuar vetëm në mbikëqyrjen e procesit të paqes në Rripin e Gazës, siç ishte parashikuar në propozimin fillestar të lidhur me një rezolutë të OKB-së.
Megjithatë, Merz theksoi se Gjermania mbetet e gatshme të bashkëpunojë me SHBA-në për gjetjen e formateve të reja që do të ndihmonin në avancimin e paqes në rajone të ndryshme të botës.
“Nuk dua ta kufizoj këtë vetëm në Gaza dhe Lindjen e Mesme. Sigurisht, kjo mund të përfshijë edhe Ukrainën”, u shpreh kancelari gjerman.