Pas një hetimi 18-mujor nga Sektori i Krimit Ekonomik dhe Financiar, në bashkëpunim me Prokurorinë e Korçës, u finalizua operacioni policor i koduar “Green Code”, që zbuloi abuzime me skemat kombëtare të mbështetjes për fermerët.
Si rezultat i hetimeve:
• 2 inspektorë të AZHBR-së dhe 6 veterinerë të DBP-së u pezulluan nga detyra, të dyshuar për veprat penale “Korrupsion pasiv i personave që ushtrojnë funksione publike” dhe “Falsifikim i dokumentave, i kryer në bashkëpunim”.
• 1 inspektor i AZHBR-së u shpall në kërkim për të njëjtat vepra.
Hetimi tregoi se këta punonjës dyshohet se kanë shpërdoruar detyrën, duke pasqyruar të dhëna të rreme në aktet e verifikimit dhe kontrollit në fermat përfituese. Inspektorët nuk kryenin kontrolle në terren, duke përfituar në mënyrë korruptive nga 10,000 deri në 50,000 lekë për fermë, duke shkaktuar një dëm të konsiderueshëm buxhetit të shtetit.
Puna për vënien para përgjegjësisë së personave të tjerë të përfshirë në këtë veprimtari vijon, ndërsa materialet proceduriale iu referuan Prokurorisë së Korçës për veprime të mëtejshme.