Ndonëse nuk ka vend për panik, Shqipëria i përgjigjet alertit të Organizatës Botërore të Shëndetësisë, OBSH, për masat në lidhje me përhapjen e Lijës së Majmunit.
“Risku është i ulët për Evropën. Gjithë vala është nga Afrika, nuk është vendi për panik. Kujdesi higjenik personal dhe shenjave klinike, nuk duhet neglizhuar. Kemi një vëzhgim korrekt edhe nga strukturat tona të shëndetit publik”, tha dr e ISHP, Eugena Tomini.
Gjithashtu doktoresha thekson se ka nisur trajnimi i mjekëve për të identifikuar sa më shpejt nëse do të ketë raste .
“Kemi aktivizuar rrjetin e alertit për të qenë të përgatitur, duke ndërgjegjësuar edhe personelin shëndetësor”, thotë doktoresha.
Instituti i Shëndetit Publik ka siguruar një sasi prej 100 dozash vaksine ndaj lijës së majmunit, të cilat mund të përdoren për personelin mjekësor ose dhe në rastet kur të ketë ndonjë qytetar të infektuar.
Drejtorja e IShP u këshillon qytetarëve të jenë të kujdesshëm ndaj higjenës si një masë parandaluese për çdo sëmundje infektive me apo pa lidhje me “lijën e majmunit”.