Carrie Johnson ka ndarë publikisht për herë të parë përvojën e saj traumatike me John Worboys, shoferin e famshëm të taksisë londineze i dënuar për drogim dhe sulme seksuale ndaj grave.
Në një rrëfim të gjatë dhe emocional, ajo tregoi se ngjarja ndodhi në vitin 2007, kur ishte vetëm 19 vjeçe dhe studente universiteti. Pas një nate në Londër, ajo hipi në taksinë e Worboys, i cili i tha se kishte fituar para në kazino dhe i ofroi një gotë shampanjë për të festuar. Edhe pse nuk dyshoi fillimisht për rrezikun, Carrie tregoi se derdhi fshehurazi pijen, ndërsa më vonë pranoi të pinte një dozë vodka që, sipas saj, ishte e droguar.
Pak pasi mbërriti në shtëpi, ajo humbi kontrollin fizik, u ndje shumë keq dhe humbi ndjenjat në banjë. Vetëm muaj më vonë, pasi lexoi në media për mënyrën se si vepronte Worboys me viktimat e tij, kuptoi se kishte qenë edhe ajo në shënjestër të tij.
Carrie ndihmoi më pas policinë duke identifikuar taksistin dhe duke dhënë prova në gjyq. Worboys u shpall fajtor për disa sulme seksuale ndaj grave dhe rasti i tij shkaktoi debat të madh në Mbretëria e Bashkuar për mënyrën si autoritetet trajtonin rastet e përdhunimit dhe sulmeve seksuale.
Ajo tregoi gjithashtu se vite më vonë u përfshi në betejën ligjore kundër lirimit të tij me kusht, duke theksuar se shumë viktima vazhdojnë të mos ndihen të mbrojtura nga sistemi. Rrëfimi i saj lidhet edhe me serialin televiziv Believe Me, i cili trajton historinë e grave që luftuan për drejtësi.