Kryeministrja italiane Giorgia Meloni ka zhvilluar një bisedë telefonike me presidentin ukrainas Volodimir Zelenski, në prag të vizitave që ky i fundit pritet të kryejë në Bruksel, Romë dhe Londër gjatë ditëve në vijim.
Gjatë komunikimit, Meloni i riafirmoi kreut të shtetit ukrainas solidaritetin e pakushtëzuar të Italisë, sidomos pas sulmeve të fundit ruse. Ajo e informoi Zelenskin se Italia do të dërgojë materiale të posaçme për mbështetjen e infrastrukturës energjetike dhe të popullsisë ukrainase.
Sipas njoftimit zyrtar të qeverisë italiane, gjeneratorë të prodhuar nga kompani italiane do t’i kalojnë Ukrainës në ditët e ardhshme, si pjesë e paketës së re të ndihmës.
Meloni ritheksoi mbështetjen e Italisë për procesin e negociatave që janë në zhvillim, si dhe përpjekjet e Shteteve të Bashkuara për të gjetur një rrugë drejt një paqeje “të drejtë dhe të qëndrueshme”. Ajo vlerësoi gatishmërinë e Ukrainës për t’u ulur në tryezën e dialogut me mirëbesim, ndërsa nënvizoi pritshmërinë që edhe pala ruse të tregojë të njëjtën hapje, në mënyrë që procesi të avancojë.