Bashkimi Europian po përgatitet për një krizë të mundshme energjetike pas zhvillimeve në Lindjen e Mesme, duke shqyrtuar masa të mundshme si racionimi i karburanteve dhe përdorimi i rezervave shtesë të naftës.
Këtë e deklaroi komisioneri europian për Energjinë, Dan Jorgensen, në një intervistë për Financial Times, duke paralajmëruar se Europa duhet të jetë gati për një situatë të gjatë emergjence.
“Është më mirë të jesh i përgatitur sesa të pendohesh”, tha Jorgensen, duke theksuar se produktet më të rrezikuara janë karburanti për avionë dhe nafta, ndërsa çmimet mund të mbeten të larta për një kohë të gjatë.
Disa vende kanë nisur tashmë masa parandalimi: Sllovenia ka vendosur kufizime në furnizimin me karburant, ndërsa në Azi janë ndërmarrë hapa si kufizimi i përdorimit të makinave dhe shkurtimi i javës së punës.
Megjithëse Europa nuk ndodhet ende në një krizë të plotë furnizimi, autoritetet në Bruksel po përgatiten për skenarë më të këqij, ndërsa ekspertët nënvizojnë se një nga sfidat kryesore mbetet ulja e kapaciteteve të rafinimit, e cila e vështirëson përpunimin e naftës bruto në produkte të gatshme.
Në rastin e Italisë, situata konsiderohet më e qëndrueshme falë kapaciteteve të saj të rafinimit, por mbeten rreziqe për rritjen e çmimeve dhe për furnizimin me naftë, pasi rezervat aktuale mbulojnë vetëm rreth një muaj konsum.