Miami Grand Prix solli një panoramë të re të forcave në Formula One, pas përditësimeve të rëndësishme që prezantuan skuadrat kryesore gjatë fundjavës në Florida.
Ndonëse Mercedes-AMG Petronas Formula One Team arriti fitoren me Andrea Kimi Antonelli, performanca e përgjithshme e makinës nuk konsiderohet më bindësja mes rivalëve kryesorë. Sipas analizave teknike, avantazhi kryesor i Mercedesit mbeti njësia e fuqisë, ndërsa shasia dhe aerodinamika u dukën më pak konkurruese krahasuar me rivalët. Fitorja u atribua më shumë talentit të pilotit sesa dominimit të paketës teknike.
Nga ana tjetër, Scuderia Ferrari prezantoi një sërë zhvillimesh të rëndësishme në modelin “SF-26”, duke ndërhyrë në njëmbëdhjetë zona të makinës. Përmirësimet aerodinamike dhanë rezultat pozitiv, veçanërisht në vijat e drejta, falë edhe krahut të ri të pasmë. Megjithatë, skuadra italiane vazhdon të vuajë mungesën e fuqisë së motorit, sidomos në dalje nga kthesat e ngadalta dhe në përshpejtim.
Skuadra që la përshtypjen më të fortë në Majemi ishte McLaren Formula 1 Team. Modeli “MCL40” tregoi potencial të madh pas paketës së re aerodinamike, duke ofruar stabilitet dhe kontroll të lartë në çdo sektor të pistës. Oscar Piastri dhe Lando Norris menaxhuan makinën me siguri të plotë, ndërsa kombinimi mes aerodinamikës dhe motorit Mercedes e shndërroi MekLarenin në skuadrën më konkurruese të fundjavës.
Edhe Red Bull Racing shfaqi progres me modelin “RB22”. Përmirësimet në sistemin e drejtimit dhe elementët aerodinamikë rikthyen besimin e Max Verstappen, ndërsa skuadra uli ndjeshëm diferencën me rivalët kryesorë. Megjithatë, makina ende shfaq probleme balancimi dhe nuk konsiderohet ende në nivelin optimal.
Pas garës së Majemit, MekLareni shihet si skuadra me paketën më të kompletuar teknike, ndërsa Mercedesi, Ferrari dhe Red Bulli mbeten shumë pranë njëri-tjetrit në luftën për dominim gjatë pjesës së mbetur të sezonit.