Kryeministri Edi Rama ka marrë pjesë në homazhet e zhvilluara në teatrin “Petro Marko” në Vlorë për gazetarin Enrik Mehmeti, i cili u nda nga jeta në moshën 40-vjeçare pas një aksidenti me motor në zonën e Porto Novës, në Zvërnec.
Familjarë, miq dhe kolegë janë mbledhur për t’i dhënë lamtumirën e fundit gazetarit që për vite me radhë raportoi zhvillimet më të rëndësishme nga qarku i Vlorës.
Enrik Mehmeti ishte një nga figurat e njohura të kronikës televizive në jug të vendit. Për vite ai ishte pjesë e News24, ku solli për publikun ngjarje nga kronika e zezë, operacionet policore, zhvillimet sociale, politike dhe turistike.
Ai u vlerësua për praninë e vazhdueshme në terren, raportimet nga vendngjarja dhe përkushtimin për të sjellë informacion të saktë e të verifikuar, edhe në situata të vështira.
Mehmeti iu bashkua News24 që në ditët e para të themelimit të televizionit, duke u kthyer ndër vite në një prej zërave më të njohur të medias lokale dhe kombëtare për zhvillimet në Vlorë.
Mesazhe ngushëllimi për ndarjen e tij nga jeta kanë përcjellë edhe kryetari i Partisë Demokratike, Sali Berisha, si dhe Sekretari i Përgjithshëm i Partisë së Lirisë, Tedi Blushi.
Ceremonia e lamtumirës për gazetarin Enrik Mehmeti zhvillohet sot në orën 14:00, ku familjarë, miq dhe kolegë do t’i japin nderimin e fundit.