Qeveria italiane ka shpërthyer në një reagim të ashpër ndaj vendimit të Gjykatës së Drejtësisë së Bashkimit Evropian, e cila theksoi nevojën për kontroll gjyqësor efektiv në përcaktimin e “vendeve të sigurta të origjinës”, sa i përket marrëveshjes së Shqipërisë dhe Italisë për emigrantët. Ky vendim, i cili ka tërhequr vëmendjen e institucioneve të larta në Itali, është parë si një ndërhyrje në fushën e politikës së emigracionit, që është
ekskluzivisht përgjegjësi e shteteve anëtare, sipas qeverisë së Romës.
Në një komunikatë zyrtare të shpërndarë nga kryeministrja Giorgia Meloni, qeveria italiane ka bërë të qartë se vendimi i Gjykatës së BE-së është një shembull tjetër i “uzurpimit të kompetencave politike nga ana e drejtësisë evropiane”. “Gjykata e BE po tenton të ndërhyjë në një çështje që nuk i takon, duke u munduar të ndërhyjë në politikën e emigracionit dhe në mënyrën se si shtetet anëtare mund të menaxhojnë këtë çështje”, thuhet në deklaratën e qeverisë.
Vendimi në fjalë ka të bëjë me përcaktimin e “vendeve të sigurta të origjinës” për azilkërkuesit dhe përfshin një akt që mund të ketë pasoja të mëdha për politikat e emigracionit të shteteve të BE-së. Gjykata e BE-së theksoi se përcaktimi i një vendi si “i sigurt” nuk mund të bëhet vetëm në bazë të një vendimi të një qeverie, pa dhënë prova të besueshme dhe të aksesueshme për të verifikuar këtë përcaktim.
Për këtë arsye, qeveria italiane e ka cilësuar vendimin si një kërcënim të drejtpërdrejtë për kapacitetin e shteteve të menaxhojnë emigracionin dhe se vendimi dobëson politikat e mbrojtjes së kufijve dhe kontrollin e migracionit të paligjshëm. Për më tepër, qeveria italiane është shqetësuar që vendimi mbështetet në burime private dhe jo në analizat e plota të bëra nga institucionet shtetërore, si ministritë përkatëse dhe Parlamenti.
Ky vendim ka ardhur pas ankesës së Gjykatës së Romës në lidhje me një rast të azilkërkuesve nga Bangladeshi, të cilët u dërguan në Shqipëri në kuadër të marrëveshjes ndërmjet Italisë dhe Shqipërisë për trajtimin e migrantëve jashtë territorit italian. Azilkërkuesit u refuzuan për shkak të përcaktimit të Bangladeshit si vend i sigurt, por Gjykata e BE-së ka vendosur që ky përcaktim nuk mund të bëhet pa pasur të dhëna të verifikueshme dhe të kontrollueshme nga gjyqësori.
Në reagimin e saj, qeveria italiane ka theksuar se nuk ka ndërmend të tërhiqet nga linja e ndjekur deri më tani. Ajo është e vendosur të vazhdojë të kërkojë çdo zgjidhje teknike dhe ligjore për të mbrojtur sigurinë e qytetarëve italianë, duke theksuar se këtë do ta bëjë për dhjetë muajt e ardhshëm, deri në hyrjen në fuqi të Paktit të Ri Evropian për Migracionin dhe Azilin. Ky pakt pritet të përfshijë kritere më të rrepta për identifikimin e vendeve të sigurta dhe për trajtimin e emigrantëve.
Kjo përplasje mes gjyqësorit evropian dhe politikës kombëtare të emigracionit në Itali ka ngritur shqetësime në lidhje me mënyrën sesi shtetet anëtare të BE-së mund të ruajnë autonominë e tyre në trajtimin e çështjeve të emigracionit, në një kohë kur rregullat dhe marrëveshjet evropiane po bëhen gjithnjë e më të ashpra.
Radar.al