Drejtuesja Politike e PS për Tiranën, Ogerta Manastirliu, ka vizituar familjet e prekura nga zjarri që përfshiu një pallat pranë Farmacisë 10 në kryeqytet.
E shoqëruar nga deputetë të PS dhe përfaqësues të Bashkisë Tiranë, Manastirliu garantoi banorët se institucionet do të jenë pranë tyre me mbështetje konkrete dhe të menjëhershme.
Ajo bëri me dije se Bashkia e Tiranës ka nisur menjëherë procedurat për miratimin e bonusit të qirasë, i cili pritet të kalojë në Këshillin Bashkiak pa vonesa.
“Kemi gjithë angazhimin institucional dhe njerëzor për t’ju qëndruar pranë. Bonuset e qirasë do të miratohen shumë shpejt,” u shpreh ajo.
Gjithashtu, Manastirliu theksoi se ka nisur procesi i vlerësimit të dëmeve nga ekspertët, i cili po kryhet në mënyrë të detajuar dhe rast pas rasti, me qëllim kompensimin sa më të shpejtë të familjeve të prekura.
Ndërkohë, autoritetet kanë nisur hetimet për të përcaktuar shkaqet dhe përgjegjësitë e ngjarjes.