Ushtria izraelite raportohet se ka krijuar një zonë të re operacionale brenda territorit të Libanit jugor, e strukturuar sipas taktikave të përdorura më parë në Gaza. Sipas raportimeve të mediave dhe burimeve ushtarake, kjo zonë po funksionon si një “vijë e verdhë” që ndalon banorët e rreth 55 fshatrave të kthehen në shtëpitë e tyre.
Radioja ushtarake izraelite bën me dije se operacionet në këto zona po vijojnë edhe gjatë armëpushimit, me synim pastrimin e infrastrukturës ushtarake të Hezbollahut dhe shkatërrimin e objekteve të dyshuara në jug të Libanit.
Sipas të njëjtave raportime, pjesëtarëve të Hezbollahut në zonat e prekura u është kërkuar të dorëzohen, përndryshe rrezikojnë eliminimin në rast identifikimi.
Ndërkohë, dronët izraelitë vijojnë të monitorojnë hapësirën ajrore mbi Libanin jugor, në kuadër të operacioneve të sigurisë.
Situata mbetet e tensionuar pavarësisht armëpushimit të njoftuar së fundmi nga SHBA, pas ndërhyrjes diplomatike të Presidentit amerikan Donald Trump, i cili zhvilloi biseda me liderët e Izraelit dhe Libanit.
Marrëveshja parashikon ndalimin e sulmeve izraelite ndaj Libanit dhe hapa nga autoritetet libaneze për të parandaluar veprimet e Hezbollahut, ndërsa Izraeli ruan të drejtën të reagojë ndaj kërcënimeve të menjëhershme.
Megjithatë, raportime nga media libaneze flasin për shpërthime dhe sulme të vazhdueshme në disa zona të jugut, përfshirë Khiyam dhe Bint Jbeil, ndërsa ushtria libaneze deklaron se nuk janë regjistruar shkelje nga Hezbollahu që nga hyrja në fuqi e armëpushimit.