Maldrita Bardho, kandidate e Partisë Socialiste në qarkun e Fierit, ka vendosur të heqë dorë nga mandati i deputetes, pavarësisht se nga rezultati përfundimtar i rinumërimit doli me më shumë vota sesa kolegia e saj, Zegjine Çaushi.
Në një reagim publik, Bardho u shpreh se ndihet e nderuar nga mbështetja e qytetarëve, por ka marrë një vendim personal për të mos hyrë në Kuvend.
“Pasi ndoqa me vëmendje rinumërimin e votave për qarkun Fier, ndihem e lumtur dhe e nderuar që kontributi im i gjatë në Partinë Socialiste është vlerësuar nga bashkëqytetarët e mi. Megjithatë, unë kam marrë një vendim të rëndësishëm – një vendim që e kam marrë përpara se të niste rinumërimi dhe që sot m’u përforcua përfundimisht”, – tha Bardho.
Ajo theksoi se do të vijojë të kontribuojë për PS-në dhe për qytetin e Lushnjës, por pa qenë pjesë e Parlamentit Shqiptar, duke ia lënë mandatin koleges dhe mikes së saj, Zegjine Çaushit.
“Do t’i lë me shumë kënaqësi vendin tim Zegjinesë, që ka luftuar ndoshta më shumë për skuadrën se sa për veten në këtë fushatë. Ajo u vu në shënjestër të sulmeve të pamerituara nga politika e vjetër dhe e përbaltjes, por është zëri që duhet në Kuvend – sidomos për të rinjtë dhe vajzat”, – u shpreh Bardho, duke theksuar se diferenca mes tyre ishte vetëm 10 vota.
Në fund të deklaratës, Maldrita Bardho falënderoi të gjithë qytetarët që e votuan dhe e mbështetën, duke shprehur përkushtimin e saj për të vazhduar të punojë me “entuziazmin dhe forcën që vetëm ne socialistët kemi”.
