Groenlanda i përket popullit të saj, ndërsa Danimarka është garantuesi i saj, deklaroi sot presidenti francez, Emmanuel Macron, duke iu përgjigjur idesë së presidentit amerikan, Donald Trump, për të aneksuar territorin danez.
“Unë bashkohem me zërin e evropianëve dhe shpreh solidaritetin tonë të plotë”, shkroi Macron në X.
Në qershor, Macron vizitoi kryeqytetin Nuuk për të konfirmuar mbështetjen e Francës për sovranitetin dhe integritetin territorial të Danimarkës dhe Groenlandës.
Presidenti amerikan, Donald Trump, emëroi dje një të dërguar të posaçëm në Groenlandë, i cili u zotua se do të bëjë territorin autonom danez pjesë të SHBA-së. Që nga kthimi në Shtëpinë e Bardhë në janar 2025, Trump ka theksuar vazhdimisht se SHBA-ja ka nevojë për ishullin e pasur me burime në Arktik për arsye sigurie, pa përjashtuar përdorimin e forcës për ta siguruar atë.
Guvernatori i Luizianës, Jeff Landry, u emërua dje si i dërguari i posaçëm në Groenlandë.
Groenlanda, e vendosur midis Amerikës së Veriut dhe Evropës, ka rëndësi strategjike për SHBA-në, Kinën dhe Rusinë në Arktik, ndërsa gara për metalet e rralla po intensifikohet, dhe shkrirja e akullit nga ngrohja globale po hap rrugë të reja për transportin detar.
Pozicioni i Groenlandës e bën atë gjithashtu në rrugën më të shkurtër për raketat midis Rusisë dhe SHBA-së. SHBA-ja ka bazën e saj ushtarake “Pituffik” në Groenlandë, pjesë kyçe e mbrojtjes nga raketat të Uashingtonit, dhe ka hapur një konsullatë në ishull në qershor 2020.
Vendosmëria e Trump për të marrë Groenlandën ka shqetësuar Danimarkën, anëtare themeluese e NATO-s, e cila ka bashkëpunuar me SHBA-në në luftërat në Afganistan dhe Irak. Në janar, Danimarka njoftoi një plan prej 2 miliardë dollarësh për të rritur praninë e saj ushtarake në rajonin e Arktikut.