Një episod simbolik i diplomacisë sportive ndodhi këtë javë gjatë samitit të Grupit të Shtatë (G7) në Kananaskis të Albertës, ku presidenti i Këshillit Europian, Antonio Costa, i dhuroi presidentit amerikan Donald Trump një fanellë të veçantë të Portugalisë, të firmosur nga vetë Cristiano Ronaldo.
Gjatë takimit privat mes dy liderëve, Costa – ish-kryeministër i Portugalisë dhe drejtues aktual i Këshillit Europian që prej vitit 2024 – i dorëzoi Trump-it fanellën me numrin 7 dhe emrin e Ronaldos, mbi të cilën qëndronte shkruar me dorë: “Për Presidentin Donald J. Trump! Luajmë për paqe.”
Presidenti amerikan, i buzëqeshur, e priti dhuratën me kënaqësi dhe u shpreh: “Më pëlqen. Luajmë për paqe.”
Cristiano Ronaldo, tashmë 40 vjeç, mbetet një nga ikonat më të mëdha të futbollit botëror. Së fundmi ai udhëhoqi Portugalinë drejt suksesit në Ligën e Kombeve të UEFA-s dhe pritet të jetë pjesë e përfaqësueses portugeze në Kupën e Botës 2026, e cila do të zhvillohet në SHBA, Kanada dhe Meksikë.