Qeveria britanike ka konfirmuar se Lordi Peter Mandelson, ish-ambasador në Uashington dhe figurë qendrore e qeverive laburiste të periudhës Blair-Brown, do të hetohet nga Policia britanike për lidhjet e dyshuara me ish-financierin amerikan Jeffrey Epstein, akuzuar për krime seksuale dhe ndjerë në 2019.
Kryeministri britanik Keir Starmer, gjatë mbledhjes së kabinetit këtë të martë, ka theksuar se Mandelson nuk duhet të mbajë më titullin Lord dhe qeveria po harton ligje që do ta ndalonin këtë. Sipas dokumenteve të Departamentit amerikan të Drejtësisë, që lidhen me Epstein, në email-et e zbuluara përmendet Lordi Mandelson mbi 6,000 herë, përfshirë informacione sensitive financiare që lidhen me krizën ekonomike të 2008-s dhe shitjen e aseteve në vlerën e 20 miliardë dollarëve.
Nga dosja paraprake rezulton se Mandelson i ka komunikuar Epstein, pas burgosjes së tij, këshilla sekrete dhe informacione të ndjeshme që i ishin dhënë ish-kryeministrit Gordon Brown, duke përfshirë edhe një paralajmërim për një bailout në vlerën e 500 miliardë eurove për Eurozonën, që mund të kishte përfitime financiare të parakohshme për Epstein.
Hetimi ndaj Mandelson ka dy dimensione: penal dhe institucional. Nëse shpallet fajtor, ai mund të përballet jo vetëm me dënim të gjatë, por edhe me heqjen e titullit Lord, duke shënuar një fund të turpshëm për karrierën e tij politike.
Lordi Mandelson, i njohur si arkitekt i Partisë së Re Laburiste të majtë-qendër në kohën e Toni Blair, ka qenë gjithmonë një figurë me ndikim në politikën britanike, por skandali lidhur me Epstein mund të tronditë rëndë reputacionin e tij dhe besueshmërinë e Partisë Laburiste.
Hetimet janë në fazat e para dhe pritet që dokumentet dhe email-et e zbuluara të analizohen më tej nga autoritetet britanike dhe amerikane, duke u dhënë një dimension ndërkombëtar këtij skandali.