Gjykata e Korçës ka pranuar kërkesën për rikualifikim të akuzës ndaj Dritson Kurtit, 21-vjeçarit i cili prej rreth 9 muajsh ndodhet në paraburgim për marrëdhënie me të mitur, pas bashkëjetesës me një 13-vjeçare të komunitetit rom me të cilën ka sjellë në jetë një fëmijë.
Akuzat ndaj Kurtit janë rikualifikuar nga neni 100/2 në nenin 100/1 të Kodit Penal, çka ul ndjeshëm dënimin e mundshëm nga maksimumi 25 vjet në një kuadër prej 7 deri në 15 vite. Në seancën e radhës pritet të dëgjohen konkluzionet e prokurorisë, ndërsa mbrojtja ka kërkuar gjykim të shkurtuar për arsye ekonomie gjyqësore.
Avokati mbrojtës tha se viktima, e mitura, nuk ka bërë kallëzim penal dhe ka kërkuar publikisht lirimin e partnerit të saj, duke theksuar vështirësitë ekonomike që po përjeton pas ndarjes së tij nga familja. Ajo deklaroi: “Ma lironi burrin, nuk ka kush të më ushqejë.”
Në mbështetje të Kurtit kanë dalë edhe familjarët e të miturës, duke theksuar traditat e komunitetit rom dhe duke kërkuar që rasti të trajtohet me ndjeshmëri të veçantë, në përputhje me konventat europiane për të drejtat e minoriteteve.
Ndërkohë, mbrojtja paralajmëron se dënimi i Kurtit mund të hapë precedent për ndëshkimin masiv të martesave të hershme brenda komunitetit rom në Shqipëri.