Pas Shkodrës, edhe në Laç është liruar një tjetër hapësirë publike që prej vitesh ishte shndërruar në pikë bllokimi dhe grumbullimi të mjeteve të sekuestruara. Ministrja e Punëve të Brendshme, Albana Koçiu, së bashku me drejtues vendorë dhe përfaqësues të institucioneve ligjzbatuese, inspektuan nga afër aksionin për pastrimin e zonës.
“Bëhet fjalë për një nga pikat që Policia e Shtetit i ka përdorur ndër vite për depozitimin e mjeteve të sekuestruara apo të konfiskuara. Në të gjithë vendin kemi me dhjetëra pika të tilla, të cilat kanë krijuar ndotje të konsiderueshme dhe janë kthyer në ambiente të pasigurta. Përmes një pune të përbashkët ndërinstitucionale, kemi nisur evidentimin dhe seleksionimin e mjeteve, për t’u dhënë fund kësaj situate,” deklaroi ministrja Koçiu.
Kjo hapësirë, pronë shtet në administrim të Komisariatit të Kurbinit, shtrihet në një sipërfaqe prej 2.6 hektarësh dhe aktualisht ka 1664 mjete të bllokuara, nga të cilat 1100 do të shkojnë për skrap. Sipas Kryeinspektores së AAPSK-së, Risena Xhaja, inventarizimi është përfunduar dhe shumë shpejt do të nisin procedurat e ankandit për lirimin e plotë të zonës.
Koçiu theksoi se synimi është kthimi i këtyre hapësirave në ambiente të dobishme për komunitetin:
“Jam e sigurt që bashkia e Laçit do të ketë projekte shumë të bukura për këtë zonë, siç ka ndodhur në Shkodër, ku një territor i ngjashëm po shndërrohet në kënd lojërash për fëmijët. Aksioni do të vijojë çdo ditë në të gjithë vendin, paralelisht me ndërhyrjet e IKMT dhe IMT-ve për lirimin e hapësirave publike të zaptuara padrejtësisht nga biznese.”
Sipas saj, qëllimi është të krijohen qytete më të pastra, më të sigurta dhe më atraktive për turistët dhe banorët:
“Do të vijojmë pa u ndalur në të gjithë territorin për t’u kthyer qytetarëve hapësirat publike dhe për t’i vënë në shërbim të komuniteteve lokale,” përfundoi Koçiu.