Një ngjarje e jashtëzakonshme ka ndodhur në Britaninë e Madhe, ku një foshnje ka ardhur në jetë pas një operacioni të rrallë që kërkonte heqjen e përkohshme të mitrës nga trupi i nënës.
Lucy Isaac, një mësuese nga Oksfordi, ishte në javën e 20-të të shtatzënisë kur iu nënshtrua një operacioni 5-orësh për të hequr një tumor kancerogjen në vezore. Mjekët vendosën të hiqnin përkohësisht mitrën e saj – ku ndodhej foshnja e palindur, Rafferty – për të trajtuar kancerin dhe më pas ta vendosnin përsëri në trup.
Kjo procedurë jashtëzakonisht e rrallë dhe me rrezik të lartë është kryer vetëm disa herë në botë. Mitra që përmbante foshnjën u mbajt jashtë trupit të nënës për rreth dy orë, ndërsa mjekët hoqën qelizat kancerogjene.
Kur Lucy ishte vetëm 12 javëshe shtatzënë, një kontroll rutinë zbuloi kancerin ovarian. Sipas mjekëve në Spitalin John Radcliffe, shtyrja e trajtimit deri pas lindjes do të kishte rrezikuar jetën e saj.
Falë vendimit të guximshëm të Lucy-t dhe bashkëshortit të saj Adam, dhe një ekipi të specializuar të udhëhequr nga Dr. Soleymani Majd, operacioni rezultoi i suksesshëm.
Rafferty lindi i shëndetshëm në fund të janarit, duke sjellë një dritë gëzimi të jashtëzakonshëm për çiftin, i cili tashmë kishte kaluar një sfidë të madhe, pasi Adam ishte operuar për transplant veshke në vitin 2022.
“Të mbajmë më në fund Rafferty në krahë pas gjithçkaje që kemi kaluar, ishte momenti më i mahnitshëm”, rrëfeu Adam me emocione.