Në ambientet e Drejtorisë së Përgjithshme të Policisë së Shtetit u zhvillua sot ceremonia e dorëzimit të pajisjeve të reja për Policinë Kufitare, të mundësuara nga Ambasada e Gjermanisë në kuadër të projektit europian EU4FAST. Ambasadori gjerman Karl Bergner dorëzoi personalisht pajisjet tek drejtori i Policisë Kufitare, Saimir Muçaj, në prani të Zëvendësdrejtorit të Përgjithshëm të Policisë, Sokol Bizhga, dhe përfaqësueses të Delegacionit të BE-së në Shqipëri, Francesca Varlese.
Pakoja e ndihmës përfshin pajisje të avancuara lexuese dokumentesh, detektorë të rrahjeve të zemrës dhe mjete të tjera teknologjike për kontrollin e dokumenteve, me një vlerë totale prej rreth 285 mijë euro. Sipas njoftimit të ambasadës gjermane, këto mjete u siguruan me iniciativën e Policisë Federale Gjermane dhe financohen nga Bashkimi Evropian, si pjesë e projektit “EU4FAST – Mbështetja e BE-së për forcimin e luftës kundër kontrabandimit të migrantëve dhe trafikimit të qenieve njerëzore në Ballkanin Perëndimor”.
Projekti zbatohet në nivel rajonal me bashkëpunimin e qeverive të Gjermanisë, Italisë, Holandës dhe Francës, duke synuar rritjen e sigurisë kufitare dhe forcimin e kapaciteteve të vendeve të Ballkanit Perëndimor në luftën kundër rrjeteve të trafikimit.
Sipas ambasadës, teknologjia e re pritet të ulë kohën e pritjes në pikat kufitare shqiptare për qytetarët, duke krijuar procedura më të shpejta dhe më të sigurta të kalimit, ndërsa njëkohësisht rrit aftësinë e Policisë Kufitare për të zbuluar dhe parandaluar raste të kontrabandimit të migrantëve në situata të rrezikshme.
Ambasadori Karl Bergner vlerësoi bashkëpunimin e ngushtë mes vendeve partnere dhe angazhimin e përbashkët për të forcuar sundimin e ligjit.
“Gjermania është krenare të mbështesë Shqipërinë dhe rajonin në përmirësimin e menaxhimit të kufirit dhe mbrojtjen e njerëzve në rrezik. Kjo është pjesë e një qasjeje të koordinuar me BE-në, Francën dhe Holandën për të luftuar kontrabandën dhe trafikimin e qenieve njerëzore në përputhje me standardet europiane”, deklaroi ambasadori.