Shtëpia e Bardhë thotë se ka anuluar një memorandum që autorizonte ngrirjen (90 ditore) federale të qindra miliarda dollarëve në grante dhe ndihma, gjë që kishte shkaktuar panik të gjerë mes miliona njerëzve që mbështeten në ndihmën e qeverisë amerikane, raporton BBC.
Vendimi i papritur vjen pasi një gjykatës e ndaloi përkohësisht urdhrin të martën, vetëm disa orë pasi u nënshkrua nga Presidenti Donald Trump.
Gjykatësi e ndaloi urdhrin deri të hënën e ardhshme, pasi u ngrit një padi nga një grup organizatash që përfaqësonin përfituesit e granteve.
Letra e re e lëshuar të mërkurën thotë “Memorandumi i OMB M-25-13 është anuluar”.
Është e paqartë se çfarë e shtyu kthesën e papritur.
Por në një deklaratë, sekretarja e shtypit e Shtëpisë së Bardhë, Karoline Leavitt tha se administrata ishte ende duke ndjekur vendimin e ngrirjes.
“Ky NUK është një anulim i ngrirjes së financimit federal. Është thjesht një anulim i memorandumit të OMB,” tha ajo.
“Pse? Për t’i dhënë fund çdo konfuzioni të krijuar nga urdhri i gjykatës. OE-të e Presidentit për financimin federal mbeten në fuqi dhe efekt të plotë dhe do të zbatohen me rigorozitet.”
Në fillim të kësaj jave, ushtruesi i detyrës së kreut të zyrës së buxhetit të Shtëpisë së Bardhë kishte udhëzuar agjencitë që “të ndalonin përkohësisht të gjitha aktivitetet që lidhen me detyrimet ose disbursimin e të gjithë ndihmës financiare federale”.
Zyra tha se masa kishte për qëllim t’i jepte kohë administratës së re për të vlerësuar se cilat grante dhe kredi ishin në përputhje me axhendën e tyre.
Trump pret fondet e ndihmës për Shqipërinë, DASH: Duhet transparencë e llogaridhënie për çdo dollar
Por urdhri shkaktoi konfuzion të gjerë se cilat agjenci dhe programe do të ndikoheshin. Një portal në internet i përdorur për të hyrë në fondet federale doli jashtë funksionit dhe grupet e ndihmës paralajmëruan për një pezullim të shërbimeve./Radar.al