TIRANË– Para pak minutash, kreu i Grupit Parlamentar të PD-së Gazment Bardhi përmes një postimi në Facebook ka reaguar pas vendosjes së gardhit metalik në hyrjen e Parlamentit dhe pranisë së forcave të shumta të Gardës së Republikës. Pasi në orën 10:00 është parashikuar të nisë seanca plenare.
POSTIMI I BARDHIT:
Ky është Kuvendi i Shqipërisë sot në mëngjes! Dera kryesore e tij e rrethuar me hekura dhe me më shumë forca sigurie sesa deputetë.
Shqipëria bëhet kështu vendi i vetëm, që nga njëra anë është vend anëtar i NATO-s dhe vend kandidat për në Bashkimin Europian, dhe nga ana tjetër rrethon hyrjen kryesore të Kuvendit për ta mbrojtur nga deputetët “armiq”!
Kuvendi nuk është burg dhe as qeli burgu, edhe pse shumica e përfaqësuesve të mazhorancës qeverisëse duhet të ishte në burg dhe jo në atë sallë. Shndërrimi i Kuvendit në “qelinë e rrethuar me hekura” të Pëllumb Gjokës e të ngjashmëve të tij është një akt që turpëron Shqipërinë dhe çdo shqiptar!