Gjykata Kushtetuese ka hedhur poshtë kërkesën e 1/5 së deputetëve të Partisë Demokratike për shfuqizimin e ligjit për zonat e mbrojtura. Vendimi u mor pas shqyrtimit të padisë së depozituar më 1 nëntor nga opozita, e cila pretendonte se ligji binte ndesh me Kushtetutën dhe marrëveshjet ndërkombëtare për mbrojtjen e mjedisit.
Në vendimin e arsyetuar, Gjykata rrëzoi shumicën e pretendimeve, duke theksuar se ligji është një “ligj kuadër” pa pasoja të drejtpërdrejta, dhe për rrjedhojë nuk cenon detyrimet që rrjedhin nga MSA-ja apo konventat ndërkombëtare si Rio, Bernë, Ramsar apo Marrëveshja e Parisit.
Për raportin financiar dhe konsultimin publik, Kushtetuesja vlerësoi se projektligji nuk sjell efekte konkrete që kërkonin përllogaritje të detajuar shpenzimesh, ndërsa konsultimi i zhvilluar nga Kuvendi u cilësua në përputhje me Kushtetutën dhe Konventën e Aarhus-it.
Për pretendimin e lidhur me MSA-në, gjyqtarët ndanë qëndrimet, por nuk u arrit shumica prej pesë votash për të shpallur papajtueshmëri. Gjykata theksoi se ligji do të marrë efekt vetëm pasi të miratohen aktet nënligjore për zonat konkrete, ku mund të bëhet vlerësimi përfundimtar për përputhshmërinë me detyrimet ndërkombëtare.
Vendimi i arsyetuar i Gjykatës Kushtetuese pritet të publikohet brenda afateve ligjore.