Një ngjarje tronditëse është zbuluar në Fier, ku një vajzë 26-vjeçare ka vrarë të atin duke e mbytur me tel, ndërsa nëna e saj dyshohet se ka bashkëpunuar në inskenimin e ngjarjes si një vdekje aksidentale.
Krimi u raportua fillimisht si një vdekje e papritur, kur rreth orës 23:00 të datës 23 korrik 2025, shtetasja Emanilda Rama, banuese në fshatin Frashër, informoi Policinë e Fierit se babai i saj, Anesti Rama, 56 vjeç, kishte humbur jetën në mënyrë aksidentale në banesën e tyre.
Menjëherë pas njoftimit, Drejtoria Vendore e Policisë Fier, në bashkëpunim me Prokurorinë e Fierit, organizoi operacionin e koduar “Inskenimi”, ndërsa hetimet paraprake nxorën në pah një sërë dyshimesh që përjashtonin mundësinë e një aksidenti.
Hetimet e thelluara zbuluan se Emanilda Rama kishte mbytur të atin me një tel, për motive që mbeten ende pjesë e hetimit. Pas aktit kriminal, ajo dyshohet se ka bashkëpunuar me nënën e saj, shtetasen Violeta Rama, 53 vjeçe, për të pastruar trupin dhe për të paraqitur ngjarjen si një vdekje natyrale ose aksidentale.
Pas inskenimit të ngjarjes, vajza njoftoi Policinë, duke pretenduar se i ati kishte ndërruar jetë në rrethana të zakonshme. Por hetimi profesional i Policisë së Fierit dhe Prokurorisë zbardhi të vërtetën e rëndë.
Aktualisht, Emanilda Rama është arrestuar, ndërsa e ëma, Violeta Rama, ndodhet e shoqëruar në ambientet e Policisë, ku po kryhen veprime të thelluara hetimore për të përcaktuar shkallën e përgjegjësisë së saj.
Hetimet vijojnë nën drejtimin e Prokurorisë së Fierit për dokumentimin e plotë të rrethanave të krimit. Materialet procedurale i janë referuar organit të akuzës për veprime të mëtejshme.