Një ngjarje e rëndë është zbuluar në Fier, ku një 26-vjeçare ka mbytur babanë e saj dhe më pas ka tentuar ta paraqesë ngjarjen si një aksident. Ngjarja ka ndodhur mbrëmjen e 23 korrikut, në fshatin Frashër.
Sipas njoftimit zyrtar të Policisë së Shtetit, pas kallëzimit të bërë rreth orës 23:00 nga shtetasja E. R., 26 vjeçe, se babai i saj, A. R., 56 vjeç, kishte ndërruar jetë aksidentalisht në banesë, u organizua operacioni i koduar “Inskenimi”.
Specialistët e Seksionit për Hetimin e Krimeve të Rënda në Drejtorinë Vendore të Policisë Fier, në bashkëpunim me Prokurorinë e Fierit, nisën menjëherë hetimet. Gjatë veprimeve të para hetimore dhe deklarimeve kontradiktore të 26-vjeçares, lindën dyshime se vdekja e 56-vjeçarit nuk kishte qenë aksidentale.
Pas hetimeve të thelluara, u arrit në përfundimin se shtetasja E. R. kishte mbytur babanë e saj me një mjet strangulues (tel), për motive të dobëta. Ajo dyshohet se ka bashkëpunuar me nënën e saj, shtetasen V. R., 53 vjeçe, për të pastruar trupin dhe për të inskenuar vdekjen si aksidentale.
Pas kryerjes së veprimeve, E. R. ka njoftuar Policinë, duke u përpjekur të mbulojë krimin. Ndërkohë, 53-vjeçarja është shoqëruar në ambientet e Policisë së Fierit, ku po kryhen veprime të mëtejshme hetimore për të përcaktuar përgjegjësinë e saj penale.
Hetimet po vijojnë nën drejtimin e Prokurorisë së Fierit, me qëllim dokumentimin e plotë ligjor të ngjarjes dhe rrethanave që çuan në këtë krim familjar. Materialet procedurale janë referuar për ndjekje të mëtejshme.