Policia e Vlorës ka ndëshkuar me masë administrative një qytetar që u kap duke lëvizur me automjet tip “Volvo” përgjatë bregdetit, pas publikimit të një videoje në rrjetet sociale.
Menjëherë pas daljes së pamjeve, shërbimet e Komisariatit të Policisë Vlorë, në bashkëpunim me specialistët e Policisë Rrugore, kanë identifikuar automjetin dhe drejtuesin e tij. Automjeti u shoqërua në ambientet e komisariatit dhe ndaj shtetasit Gj. I. u vendos një gjobë prej 53 000 lekësh.
Policia njoftoi se masa administrative u vendos për shkeljen e tre neneve të Kodit Rrugor që lidhen me: Rregullimin e qarkullimit në qendrat e banuara; Tejkalimin e shpejtësisë së lejuar; Mosrespektimin e sinjalizimit rrugor.
Gjithashtu, Policia sqaroi se personi i ndëshkuar nuk ka lidhje me Policinë e Shtetit, duke përgënjeshtruar spekulimet që qarkulluan në rrjet.
Drejtoria Vendore e Policisë Vlorë theksoi angazhimin e saj maksimal për të garantuar rendin dhe sigurinë gjatë sezonit turistik, duke u shprehur se çdo shkelje që cënon sigurinë publike do të ndëshkohet me zero tolerancë. Po ashtu, qytetarët janë ftuar të denoncojnë çdo shkelje apo paligjshmëri në numrin 112.