Në vijim të përshkallëzimit të tensioneve në Lindjen e Mesme, pas sulmeve të fundit amerikane ndaj objekteve bërthamore iraniane, udhëheqësit e Francës, Gjermanisë dhe Mbretërisë së Bashkuar i kanë bërë thirrje Iranit që të shmangë çdo veprim që mund të thellojë krizën dhe të çojë në destabilizim të mëtejshëm të rajonit.
Në një deklaratë të përbashkët, Presidenti francez Emmanuel Macron, Kryeministri britanik Keir Starmer dhe kancelari gjerman Friedrich Merz theksojnë rëndësinë e rikthimit në tryezën e bisedimeve. Ata i kërkojnë Iranit që të angazhohet për një marrëveshje të re gjithëpërfshirëse mbi programin e tij bërthamor.
“Ne mbetemi të përkushtuar për të kontribuar në këtë proces, në bashkëpunim me të gjitha palët e përfshira”, thuhet në deklaratë.
Apeli i tre liderëve vjen në një moment kur zhvillimet ushtarake dhe politike në rajon kanë krijuar një klimë të rëndë pasigurie, duke rritur shqetësimet për një përshkallëzim më të gjerë të konfliktit në Lindjen e Mesme.