Kreu i Prokurorisë së Posaçme, Altin Dumani, paraqiti sot në Kuvend raportin vjetor të SPAK për vitin 2024, ku theksoi se niveli i krimit të organizuar në vend mbetet serioz, ndërsa presionet ndaj prokurorëve vijojnë të jenë të pranishme.
“Ka presion nga aktorë politikë, mediatikë dhe nga krimi i organizuar në drejtim të SPAK”, deklaroi Dumani para deputetëve.
Sipas raportit, pastrimi i parave mbetet një nga fenomenet më të rrezikshme, ndërsa trafikimi i qenieve njerëzore paraqitet me “numër mesatar rreziku”. Dumani nënvizoi se grupet kriminale vijojnë të jenë aktive, veçanërisht në trafikimin dhe transportimin e lëndëve narkotike.
Në fushën e korrupsionit, SPAK ka regjistruar një rritje të hetimeve ndaj funksionarëve publikë, 10 zyrtarë të lartë janë gjykuar gjatë vitit 2024, ndërsa 33 ish-zyrtarë të tjerë janë aktualisht nën hetim.
Kryeprokurori vuri në dukje edhe rolin e bashkëpunimit ndërkombëtar, duke bërë me dije se janë zhvilluar 27 skuadra të përbashkëta hetimore me agjenci partnere jashtë vendit.
“SPAK do të vazhdojë punën pa u ndikuar, pavarësisht presioneve,” — përfundoi Dumani.