Komisioneri Shtetëror i Zgjedhjeve, Ilirjan Celibashi, ka miratuar sot rezultatin përfundimtar të zgjedhjeve të 11 majit në qarkun e Kukësit, mes kundërshtive të forta nga Partia Demokratike.
Sipas të dhënave zyrtare të paraqitura nga Celibashi, në total në kuti u gjetën 40.276 fletë votimi, prej të cilave 38.825 ishin të vlefshme dhe 1.551 të pavlefshme.
Koalicioni Partia Demokratike – Aleanca për Shqipërinë Madhështore ka marrë 20.769 vota, duke u renditur forcë e parë në këtë qark. Pas saj vjen Partia Socialiste me 11.770 vota.
Megjithatë, Partia Demokratike ka kundërshtuar ashpër miratimin e rezultatit. Përfaqësuesi i saj ligjor, Marash Logu, deklaroi se procesi nuk përmbushi standardet e zgjedhjeve të lira dhe të ndershme.
“Nuk kemi qenë përballë një gare normale politike, por përballë një makinerie kriminale të organizuar për të deformuar vullnetin e qytetarëve, brenda dhe jashtë vendit,” – u shpreh Logu.
Ai akuzoi qeverinë se ka përdorur fonde publike për blerje votash, krahas financimeve nga krimi dhe korrupsioni. Sipas tij, edhe task-forca kundër krimeve zgjedhore dështoi në misionin e saj, ndërsa ngriti shqetësime edhe për parregullsitë në votën e diasporës.
Nga ana e tij, Komisioneri Celibashi theksoi se çdo pretendim për parregullsi apo shkelje ligjore në procesin zgjedhor do të trajtohet në një fazë tjetër dhe në instancat përkatëse.