Kryeministri në detyrë i Kosovës, Albin Kurti, ka deklaruar se përpjekjet për të arritur një marrëveshje me partitë e tjera politike për konstituimin e Kuvendit kanë dështuar.
I pyetur nga gazetarët gjatë një aktiviteti në Podujevë, Kurti tha se Lëvizja Vetëvendosje i ka konsumuar të gjitha hapat në drejtim të një marrëveshjeje, duke ofruar dy kompromise, por pala tjetër nuk ka treguar vullnet për bashkëpunim.
“Takimet që kemi zhvilluar nuk kanë sjellë rezultat, edhe pse kemi ofruar dy kompromise serioze. Ne kemi përfunduar gjithçka që na takon, ndërsa nga ana tjetër nuk kemi parë një ofertë për bashkëpunim”, deklaroi Kurti gjatë inaugurimit të shërbimit të ri të hemodializës në Spitalin e Podujevës.
Situata e bllokuar politike në Kosovë vijon të mbetet pa një zgjidhje konkrete, ndërsa procesi i konstituimit të Kuvendit është në ngërç, për shkak të mospajtimeve mes partive politike për ndarjen e përgjegjësive institucionale.
Radar.al