TIRANË– Konferenca e Kryetarëve ditën e sotme ka miratuar listat e anëtarëve të komisioneve të përhershme. Por ajo që ra në sy ishte mungesa e propozimeve nga opozita.
Vetëm Partia Socialiste dorëzoi propozimet e emrave për komisione, por edhe përfaqësuesit e opozitës në deklarata publike janë shprehur se nuk do lënë asnjë hapësirë bosh në parlament, që nënkupton se do i dorëzojnë në një moment të dytë listat.
Gjithashtu nën drejtimin e Kryetarit të Kuvendit, Niko Peleshi, u zhvillua sot mbledhja e Konferencës së Kryetarëve, me fokus miratimin e listës së anëtarëve të komisioneve të përhershme të Kuvendit, si dhe të listës së anëtarëve zëvendësues.
Bazuar në njoftimin zyrtar të Kuvendit, në mbledhje u bë e ditur se për të dyja pikat e rendit të ditës, propozimet janë depozituar vetëm nga Grupi Parlamentar i Partisë Socialiste.
Pas shqyrtimit në Konferencën e Kryetarëve, çështja do t’i kalojë për miratim seancës plenare të Kuvendit. PD pritet që ta kalojë çdo vendim të sajin nëpërmjet mbledhjes së grupit, teksa kërkon përsëritjen e seancës së javës së kaluar që u mbyll për 25 minuta me votimin e programit të qeverisë dhe kabinetit të ministrave vetëm me votat e mazhorancës. Gjithashtu kërkon mocion për shkarkimin e kryeparlamentarit Niko Peleshi, teksa pritet t’i drejtohet edhe Kushtetueses për ndryshimin e rregullores së Parlamentit./Radar.al