Komisioni për Çështjet Ligjore dhe Administratën Publike ka shpallur sërish vakancën për pozicionin e Avokatit të Popullit, duke hapur garën për kandidatët që dëshirojnë të aplikojnë brenda 20 ditëve nga vendimi.
Opozita kundërshtoi këtë hap, duke argumentuar se vakanca ishte shpallur një herë gjatë legjislaturës së kaluar dhe nuk ka nevojë të përsëritet. Por kryetari i Komisionit, Ulsi Manja, sqaroi se procedura e re është e domosdoshme, pasi një pjesë e deputetëve të mëparshëm që kishin firmosur mbështetjet për kandidaturat nuk janë më pjesë e Kuvendit.
Vendimi për shpalljen e vakancës u mor vetëm me votat e shumicës socialiste (8 pro), ndërsa 5 deputetët e opozitës bojkotuan votimin. Po ashtu, me 13 vota u miratua edhe hapja e vakancës për Komisionin e Mbikëqyrjes së Shërbimit Civil.
Avokates së Popullit, Erinda Balanca, i ka përfunduar mandati që në maj 2022, por ajo ka vijuar detyrën në mungesë të një pasardhësi të zgjedhur. Në seancën e fundit të legjislaturës së kaluar, Partia Demokratike kishte kërkuar futjen urgjente në rend të ditës të votimit për emrin e propozuar prej saj, Besim Ndregjoni.