Kolonja mbetet një nga zonat me rrezik më të lartë për përhapjen e murtajës së ruminantëve, për shkak të numrit të lartë të bagëtive të imta dhe pranisë së tufave migratore. Aktualisht, në territorin e kësaj zone mbahen rreth 47 mijë krerë bagëti të imta, përfshirë edhe 15 tufa të ardhura sezonalisht nga Saranda, Konispoli dhe Vlora, secila me rreth 300 krerë.
Rreziku për përhapjen e murtajës shtohet edhe për shkak të vijës së gjatë kufitare me Greqinë dhe lëvizjeve të pakontrolluara të bagëtive. Megjithëse deri tani nuk është regjistruar asnjë rast infektimi në Kolonjë dhe situata konsiderohet e qëndrueshme, autoritetet kanë zhvilluar një takim informues me blegtorët e zonës për forcimin e masave të sigurisë dhe zbatimin e protokolleve veterinare.
Në nivel qarku, Korça numëron rreth 205 mijë krerë bagëti të imta. Deri më tani, një rast i murtajës është konfirmuar në fshatin Shuec të Devollit, ku janë ndërmarrë masa të menjëhershme parandaluese. Si pjesë e kontrolleve, në tregjet e Çërravës dhe Korçës është ndaluar shitja e bagëtive të imta, në përputhje me protokollet zyrtare të sigurisë.