Qeveria kineze ka vendosur masa të reja rregullatore për influencuesit dhe krijuesit e përmbajtjes në rrjetet sociale, duke synuar rritjen e besueshmërisë dhe reduktimin e dezinformimit në internet. Ligji hyn në fuqi që nga 25 tetori 2025 dhe kërkon që çdo ndikues që diskuton tema të ndjeshme si mjekësia, ligji, arsimi apo financat, të posedojë diploma ose certifikime zyrtare që vërtetojnë kualifikimin e tij.
Administrata Kiberhapësinore e Kinës ka theksuar se qëllimi i ligjit është të rregullojë kaosin online dhe të sigurojë që përdoruesit e rrjeteve sociale të marrin informacion të saktë dhe të verifikuar, duke parandaluar keqinformimin nga persona që nuk kanë trajnim profesional.
Platforma të njohura si Douyin, Bilibili dhe Weibo do të jenë përgjegjëse për verifikimin e kualifikimeve të influencuesve dhe monitorimin e postimeve të tyre, duke kërkuar që përmbajtja të përfshijë referenca të sakta dhe paralajmërime të qarta mbi origjinën e informacionit. Krijuesit e përmbajtjes do të duhet gjithashtu të deklarojnë kur informacioni i tyre bazohet në studime shkencore ose kur përdorin Inteligjencën Artificiale për të prodhuar materialin e publikuar.
Ligji ka për qëllim të vendosë rend dhe transparencë në botën dixhitale, ku influencerët shpesh fitojnë ndjekës dhe ndikim duke u bazuar vetëm në imazhin dhe personalitetin e tyre, pa pasur njohuri të thelluara për temat që diskutojnë. Sipas kritikëve, megjithatë, ky legjislacion mund të ngjajë me censurë dixhitale, duke vendosur barriera për ata që dëshirojnë të ndajnë mendime të pavarura dhe duke kufizuar debatin publik.
Ekspertët e sigurisë dixhitale shprehen se, ndërkohë që ligji synon të luftojë dezinformimin dhe të rrisë besueshmërinë e informacionit, ai duhet të gjejë një ekuilibër mes kontrollit dhe lirisë së fjalës, duke mos penguar kreativitetin dhe inovacionin që influencuesit sjellin në internet.
Ky legjislacion nuk ka rëndësi vetëm për Kinën, por mund të shërbejë si precedent për vendet e tjera, që po përballen me sfidën e përhapjes së lajmeve të rreme dhe teorive të konspiracionit në rrjetet sociale. Institucionet kineze synojnë të rivendosin rendin dhe besueshmërinë, ndërsa krijuesit e përmbajtjes përpiqen të thyejnë kufijtë e komunikimit digjital.