Ukraina do të zhvillojë së shpejti bisedime me zyrtarë të lartë amerikanë në Zvicër, për të diskutuar parametrat e planit të paqes të propozuar nga Donald Trump për t’i dhënë fund luftës me Rusinë. Lajmin e konfirmoi kreu i Këshillit të Sigurisë së Ukrainës, Rustem Umerov.
“Në ditët në vijim, do të nisim konsultimet në Zvicër me delegacionin amerikan për një marrëveshje të mundshme paqeje”, shkroi Umerov në Facebook. “Ukraina i hyn këtij procesi me një qasje të qartë për interesat e saj. Kjo është një fazë e re në dialogun që ka vazhduar prej ditësh dhe që synon të harmonizojë vizionet tona për hapat e ardhshëm.”
Presidenti Volodymyr Zelensky nënshkroi sot dekretin për formimin e delegacionit ukrainas, i cili do të marrë pjesë në bisedime me SHBA-në, partnerët ndërkombëtarë dhe – sipas dokumentit – me përfaqësues rusë. Delegacioni do të drejtohet nga shefi i kabinetit të presidentit, Andriy Yermak, dhe do të përfshijë drejtuesit e shërbimeve të sigurisë, inteligjencës dhe Shefin e Shtabit të Përgjithshëm – pra, thelbësisht një ekip me përbërje të lartë ushtarake.
Vetë Zelensky të premten kundërshtoi publikisht planin amerikan, duke paralajmëruar se do t’i propozojë Uashingtonit alternativa. Në Kiev ka shqetësim, pasi dokumenti përfshin disa kërkesa thelbësore të Moskës, përfshirë lëshime territoriale dhe reduktimin e ushtrisë ukrainase, edhe pse ofron garanci sigurie nga Perëndimi.
Sipas raportimeve, Donald Trump dhe Vladimir Putin i kanë shtuar presionin Zelenskyt që të pranojë propozimin.