Një ngjarje me armë zjarri ka ndodhur pasditen e sotme në Shkafanë të Ishmit, Durrës, ku një 35-vjeçar ka mbetur i plagosur në këmbë. Viktima, i identifikuar si M. J., është dërguar me urgjencë në Spitalin Rajonal të Durrësit dhe ndodhet jashtë rrezikut për jetën.
Sipas njoftimit zyrtar të Policisë, plagosja ka ndodhur pas një konflikti të çastit për motive të dobëta. Autori i dyshuar është shtetasi A. D., i cili dyshohet se qëlloi me pistoletë mbi viktimën. Ai është ndihmuar nga bashkëpunëtori R. A., ndërsa të dy janë shpallur në kërkim.
Shërbimet e Policisë janë vënë menjëherë në ndjekje të autorëve dhe kanë nisur një hetim të plotë për zbardhjen e rrethanave të ngjarjes. Grupi hetimor po punon për dokumentimin ligjor të rastit.