Fëmijët në Lituani do të mësojnë të ndërtojnë dhe përdorin dronë, si pjesë e një programi kombëtar për të rritur aftësitë e popullsisë në përballjen me kërcënime të mundshme nga Rusia.
Iniciativa, e përbashkët mes ministrive të Mbrojtjes dhe Arsimit, synon të trajnojë mbi 22 mijë persona, nga nxënës të shkollës fillore deri te ata të gjimnazit, në përdorimin dhe prodhimin e mjeteve ajrore pa pilot.
Plani parashikon që nxënësit 8-10 vjeç të mësojnë të ndërtojnë dhe pilotojnë dronë të thjeshtë, ndërsa ata të shkollave të mesme të krijojnë pjesë, të ndërtojnë dhe të fluturojnë modele më të avancuara.
Qeveria lituaneze ka vënë në dispozicion 3.3 milionë euro për pajisje, duke përfshirë dronë, sisteme kontrolli, transmetim video dhe një aplikacion trajnues për UAV.
Ashtu si Estonia dhe Letonia, Lituania – e kufizuar me enklavën ruse të Kaliningradit dhe Bjellorusinë, ka forcuar masat e sigurisë pas pushtimit të plotë të Ukrainës nga Rusia.
Tensionet në rajon mbeten të larta. Vetëm pak ditë më parë, Estonia dëboi një diplomat rus për “ndërhyrje të vazhdueshme” në punët e brendshme të vendit, duke shtuar më tej shqetësimet për sigurinë e shteteve baltike.
Radar.al