Një person është arrestuar sot në Prishtinë nga Policia e Kosovës, nën dyshimin se ka dërguar email-e kërcënuese në adresë të Prokurorisë së Shtetit, Policisë së Kosovës dhe Universitetit të Prishtinës (UP).
Sipas njoftimit zyrtar, hetuesit e Drejtorisë për Hetimin e Krimeve Kibernetike, në koordinim me Prokurorinë Themelore në Prishtinë, kanë ndërmarrë aksionin pas disa muajsh hetime. Gjatë kontrollit të zhvilluar sot, më 22 maj 2025, në një lokacion në Prishtinë, është arrestuar i dyshuari dhe janë sekuestruar si prova materiale një laptop, një tablet dhe një telefon, të cilat mendohet se janë përdorur për dërgimin e kërcënimeve.
I dyshuari është ndaluar për 48 orë, ndërsa ndaj tij rëndon akuza për veprën penale “kanosje”.
Policia thekson se mesazhet kërcënuese janë dërguar në mënyrë të përsëritur dhe kanë pasur si cak edhe zyrtarë të lartë të institucioneve.